Agarda que o país feche 2020 cunha taxa de paro do 20,8% e unha caída do Produto Interior Bruto (PIB) próxima ao 8%.
15 abril 2020
O Fondo Monetario Internacional (FMI) vén de facer pública durante a xornada de onte a actualización das súas estimacións macroeconómicas para o Estado español, que son significativamente peores como resultado do impacto da pandemia do coronavirus, de modo que agora agarda que o país feche 2020 cunha taxa de paro de 20,8% e unha caída do Produto Interior Bruto (PIB) próxima a 8%.
Trátase dos peores datos macro rexistrados polo Estado español en moitos anos, pois de confirmarse a contracción de 8% da economía sería o peor dato rexistrado en toda a serie histórica do Instituto Nacional de Estatística (INE), que comezou en 1970, así como, probabelmente, a maior crise económica experimentada polo país desde a guerra civil española.
"Resulta moi probábel que a economía global experimente a súa peor recesión desde a Gran Depresión dos anos 30, quedando por enriba da vivida durante a crise financeira global de hai unha década. Prevemos que a Gran Reclusión, como se podería chamar, diminuirá o crecemento global de forma dramática", agregou Gopinath.
María Jesús Montero, portavoz do Goberno español e ministra de Facenda, considera que aínda é "prematuro" realizar estimacións sobre o impacto na economía da COVID-19, en referencia ao informe do Fondo Monetario Internacional.
Ademais, resaltou que "quizais a única luz" do informe do FMI é que o crecemento da economía roldará 4% o próximo ano, coincidindo co Executivo na importancia de "medrar" en 2021.
Derivado de Diario Nós.
