O factor máis importante da propagación da pandemia foi o gran número de visitantes que acudiron a Madrid ou se desprazaron desde ela ao resto do territorio.
18 maio 2020
Mattia Mazzoli, David Mateo, Alberto Hernando, Sandro Meloni e Jose Javier Ramasco acaban de publicar un estudo que cuantifica a relación entre as viaxes dentro do Estado español e a pandemia do coronavirus. Un estudo, que recolle Vilaweb, do que resulta que 76% do pico da pandemia no Estado ten a súa orixe nas viaxes desde ou a Madrid.
Mazzoli, Meloni e Ramasco son investigadores do Instituto de Física Interdisciplinar e Sistemas Complexos do CSIC e da Universidade das Illas Baleares, mentres que Mateo e Hernando traballan en Kido Dynamics, unha compañía de datos en masa con sede en Lausana que fixo un traballo sobre a dinámica das viaxes no Estado.
Os resultados do estudo publicáronse esta fin de semana nun artigo en Naukas, unha web de contidos científicos.
Os autores explican que mediron a relación entre o desprazamento e a propagación da pandemia: "En particular, comparamos o número de visitantes entre o foco principal de España (Madrid) coas outras provincias, tanto residentes en Madrid que as visitaron como os veciños das outras provincias que visitaron Madrid, porque ambos os dous sentidos son importantes na transmisión.
E o resultado é que se comparamos o pico da mortaldade Covid-19 en cada provincia co número de visitantes per cápita unha semana antes (do estado de alarma) cruzado con Madrid, atoparemos unha correlación directa : Unha análise multivariante dinos que 76% do pico de mortalidade explícase pola mobilidade entre cada provincia con Madrid e a súa ratio coa poboación local. Non é a única causa, pero é a máis grande con moita diferencia.
Segundo o estudo "unha vez que Madrid foi o foco, a propagación da epidemia desde a capital ao resto do territorio seguiu nin máis nin menos que se esperaba á vista dos patróns de movemento no interior. Se comparamos o patrón de Madrid co de Barcelona, as diferenzas son visíbeis a simple vista. Sen un peche preventivo nos primeiros días, este patrón de expansión era inevitábel"
Segundo os investigadores, "o factor máis virulento en España foi o gran número de visitantes que se dirixiron ao foco -de Madrid- ou marcharon en relación á poboación local doutras cidades, o que provocou o efecto multi-semente. En lugar do modelo clásico paciente-cero, temos varios focos independentes entre si nun curto período de tempo. Neste caso, a mesma rede de contactos pode xerar embotellamentos naturais que limitan a propagación do virus e aforran tempo para reaccionar antes de que se active o número de casos. Nestas situacións pódense tomar medidas como en Corea do Sur, onde os individuos poden ser vixiados de preto e en corentena por algún tempo. Porén, nun escenario multi-semente, o seguimento individual é difícil de dimensionar ou práctico porque non hai bloqueos na difusión, polo que as únicas medidas realistas son as de carácter xeralista, pechar as localizacións e reducir os movementos".
Sen culpábeis
Este equipo de investigación indica que as viaxes ás que se refire foron"ANTES do Estado de Alarma". Por iso, indica, "non hai nada fóra do común nestes patróns de movemento, nin nada para botar as mans na cabeza. Non hai culpábeis, fomos toos nós facendo as nosas vidas como cada día como se agardaba que fixésemos nesa época do ano dun principios de marzo calquera".
Derivado de Nós Diario
