Un estudo expón que consumir máis de catro porcións diarias relaciónase co maior risco de mortalidade, independentemente doutras causas.
31 maio 2019
Inxerir máis de catro racións diarias de alimentos ultraprocesados incrementa nun 62% o risco de mortalidade, independentemente doutras causas. É máis, por cada ración adicional o risco crece un 18 %. Esta é a principal conclusión dun estudo en case 20.000 graduados universitarios de toda España que forman parte da cohorte ‘Seguimento Universidade de Navarra’ (SUN), dirixido por Miguel A. Martínez-González, do Centro de Investigación Biomédica en Rede de Fisiopatología da Obesidade e Nutrición (CIBEROBN).
Estudos previos xa atoparan nos ultraprocesados a orixe de numerosos problemas cardiometabólicos
O novo traballo, publicado no British Medical Journal, recolle o consumo de alimentos e bebidas durante 15 anos (1999-2014) de 19.899 voluntarios (12.113 mulleres e 7.786 homes), a través dun cuestionario de frecuencia. No tempo analizado producíronse 335 mortes.
Maira Bes-Rastrollo, autora principal e investigadora na Universidade de Navarra, afirma que “estudos previos xa atoparan nos ultraprocesados a orixe de numerosos problemas de saúde cardiometabólicos, como un aumento de risco de sobrepeso e mesmo depresión”.
investigadores_ ultraprocesados
Ultraprocesados, unha comida “letal”
Segundo a clasificación NOVA, os alimentos ultraprocesados son formulacións industriais elaboradas a partir de ingredientes refinados (azucre, amidóns, aceites vexetais, sal) ou sintetizados (graxas trans, proteína hidrolizada, aditivos), e non conteñen ningún alimento enteiro recoñecible.
Se un produto ten máis de cinco ingredientes, probablemente sexa ultraprocesado, como os refrescos azucrados, embutidos, sobremesas lácteas azucradas, galletas, bolería industrial ou os cereais para o almorzo.
Caracterízanse pola súa baixa calidade nutricional, conveniencia (están listos para consumir en calquera momento, sen necesidade de preparación), dispoñibilidade (a contorna favorece o seu consumo) e hiperpalatabilidade (son extremadamente saborosos).
Ademais, desprazan o consumo de alimentos beneficiosos e afástanse dos patróns alimentarios verdadeiramente saudables como a dieta mediterránea tradicional, que se asociou cunha forte redución de risco cardiovascular e de cancro de mama no estudo PREDIMED.
Referencia: Association between consumption of ultra-processed foods and all cause mortality: SUN prospective cohort study (Publicado en British Medical Journal).
Derivado de GCiencia.
